聲音故事.各家自訴貧窮說
跳往主要內容
開始主要內容

聲音故事.各家自訴貧窮說

Together Empower

「貧窮說」主頁一起市集一起扶貧一起聆聽公司參與捐款支持扶貧工作


貧窮有話説,你願意聽嗎?10月17日是國際滅貧日,我們希望藉着這別具意義的日子,喚起公眾對貧窮的關注,加入扶貧的行列。2021年,樂施會與「StoryTeller說故事」合作,製作4個與貧窮有關的故事,邀請唱作音樂人林家謙、關心社會的叱咤903 DJ急急子、關注氣候變化的唱作歌手Manson張進翹,以及聲音甜美的女歌手Cloud雲浩影,用聲音演繹這4個發生在不同地方、不同背景的貧窮故事,希望讓公眾對「貧窮」有多一份新的理解。聽完故事,也邀請大家了解故事背後的數據真相
 

#貧窮說 ep1:【清潔工人】
(聲音演繹:林家謙)

貧窮說,我不只是餓,也不只是無錢。

貧窮說,我很熱,在極端天氣下,我比其他人更熱。我每天捱著中暑的不適,手停口停,卻未能享有適當的勞工保障。

〖聲音稿〗

做咗清潔工一段時間,陳伯仲係未習慣喺大熱天時開工
 
今日天氣好熱,新聞話有成36度,係今個月破紀錄最熱嘅一日
佢著住又唔索汗又唔透氣嘅藍色制服,身水身汗攞住掃把掃完一個街口
再慢慢咁推住架車去下一條街
 
呢幾年天氣愈嚟愈熱
間唔中就有工友頂唔順中暑,要去睇醫生
啲工友成日話,「做耐咗你就慣㗎啦」
講係咁講啫,咁熱嘅天氣,真係好難習慣
 
件衫侷促未係最慘,最慘係成日無得飲水
清潔工要補水,就要去垃圾站
但垃圾站淨係得熱水煲,工友要自己煲水飲
 
大熱天時唔想飲滾水嘅話,就要自己帶水
所以好多工友都會帶住大大枝水出街
辛苦抬住啲水,總好過口渴無水飲吖嘛
 
清潔工係無休息時間嘅,如果想飲水
就要鬼鬼鼠鼠,偷偷摸摸咁行埋一邊飲
因為好驚比人見到
 
唔好話食飯啦
試過有工友因為飲水而比市民投訴,搞到好麻煩
陳伯有時都會諗,大家都係人,飲啖水點解都要驚驚青青呢?
 
話咁快佢帶出嚟果兩枝水已經飲晒
垃圾站又好遠,好難返去煲水飲
平時陳伯已經唔敢開冷氣
淨係開風扇,交電費已經用好多錢
喺街買水飲要比錢,佢真係唔捨得
 
於是,就算佢開始頭暈暈,唔太清醒
都只可以同自己講,頂住先,忍耐下
然後繼續攞起掃把掃地
到真係頂唔順果一刻
陳伯喺一棟舊式大廈嘅門口坐低,諗住抖一陣就無事
 
呢個時候,有位保安行近
陳伯心諗,保安行過嚟一定係想趕佢走
於是佢撐住掃把好辛苦咁爬起身
點知,保安原來攞住一枝水,仲話:
 
「天氣咁熱,請你飲枝水啦。」
 
好多人都話,香港係個好熱嘅地方
但住喺呢度嘅人大部份都好冷酷
 
不過,原來都仲有人係咁温暖嘅
 
佢接咗枝水,飲咗一啖,對住個保安微微一笑
由心咁講咗一句「多謝」
 
好多人以為,窮就係無飯食無屋住
但其實窮有好多種
窮係可以令你連熱都熱過其他人
 
陳伯喺心入面諗,如果呢個城市入面
大家都願意諗多一步,變得寬容啲
更加體諒身邊嘅人,你話幾好呢?

〖完〗

 

 

#貧窮說 ep2:【保安與蕃茄】 
(聲音演繹:急急子)

貧窮說,我有工作,但我只能蝸居劏房;

我有家,但我無法讓孩子吃得有營養。

〖聲音稿〗

身為一位保安,見到有閒雜人等坐喺大廈門口
其實係應該趕佢走

不過黃生認得,佢就係平時清潔呢條街嘅清潔工
先至諗起今日天氣咁熱,佢頂唔順先會坐一陣
於是黃生走去雪櫃,攞咗枝私伙嘅樽裝水,走埋去同佢講:

「天氣咁熱,請你飲枝水啦。」

疫情開始無耐,黃生就失咗業
本來佢係做廚嘅,一家人住喺屯門嘅劏房
仲要照顧老婆、仲細嘅囝囝,同埋有長期病嘅細佬

於是佢開始報讀唔同課程,例如學做點心,整麵包,仲考埋保安牌
揾咗好耐工,卒之真係比佢揾到份保安嚟做

平時一收工,佢都會趕返屋企
不過今日有啲唔同
因為佢要帶個仔入深水埗見營養師 

黃生做廚嗰陣,煮嘅嘢個個都讚
唯獨是自己個仔淨係鐘意食蕃茄,其他就乜都唔食
更加從來無讚過爸爸煮嘅嘢好食
而且又瘦又輕,做爸爸嘅當然心痛
後來佢發現,有間社區中心會為基層家庭小朋友做營養諮詢
雖然要搭成個鐘車去,但都決定帶個仔去試下

去到先知,原來好多基層家庭小朋友都有偏食問題
有小朋友淨係肯食雞翼同雞蛋
仲有小朋友淨係食豉油撈飯
又或者家長本身亦都唔識點去配搭出營養均衡嘅菜式
所以小朋友就容易太瘦或者太肥

營養師話,囝囝肯食蕃茄已經唔錯
於是建議黃生煮多啲同蕃茄有關嘅菜式
例如用電飯煲就整到嘅蕃茄蝦仁燉飯、
想飲碗湯就煲番茄節瓜蛋花肉片湯
勢估唔到,一個小小嘅蕃茄可以有咁大嘅威力
依家望到個仔食飯食到清曬碟,黃生真係一天都光晒

好多人以為,窮就係無錢開飯
但其實窮有好多種
窮都可以有飯食,但係無營養

如果小朋友肯食,家長死慳死抵都會將最好嘅嘢留比佢哋
問題係,大部份基層家長都無營養知識
自然唔知點先解決到偏食問題

果一餐,仔仔食晒所有餸之後
終於都講咗一句黃生等咗好耐嘅說話:

「爸爸,你煮嘅嘢真係好好食啊!」

〖完〗
 樂施會「慳得有營 2.0 - 社區流動營養診所」計劃

 

#貧窮說 ep3:【農夫和他的種子銀行】 
(聲音演繹:Manson 張進翹)

貧窮說,氣候變化下,

就算有地種田,多努力都可以一無所有。

〖聲音稿〗

何小麥出世喺廣西嘅一條小村落,世世代代都靠耕種維生
種豆,種米、種蕃茄,幾乎乜嘢都種

近幾年天氣好熱,有時好耐都唔落雨,一落雨就係暴雨
種啲嘢好多時唔係曬乾就係俾暴雨打冧,真係好難搞
本來去咗城市打工嘅小麥
決定帶住自己喺城市學到嘅銷售知識
返鄉下做農夫
仲幫條村建立咗「社區種子銀行」

以前好多農夫都會各自保留種子,大家自己顧自己咁種
如果某個品種夾唔啱個天氣,果年嘅收成就會係零
有咗社區種子銀行,唔同農夫、唔同村落之間可以互相交換種子
種多幾個品種,提高成功收成嘅機會
一個人嘅力量好有限,結合唔同村落嘅小農,力量就大得多

好多人以為 
窮就係無飯食無屋住 
其實窮有好多種 
在氣候變化嘅影響下 
就算有地種田,幾努力都可能一無所有 

呢幾日,多咗個新面孔嚟揾何小麥學嘢
果個就係陳小姐
陳小姐嚟自香港,本身係一位社工
平時好鍾意種嘢,會做假日農夫
佢聽到廣西呢邊有人搞緊種子銀行
就專程過嚟搵何小麥取經

小麥好開心,因為佢終於可以同人分享自己搞種子銀行嘅經驗
佢心入面明白,自己用緊嘅方法喺國內都唔係主流
好多人貪快貪易,鍾意用農藥化肥同外來嘅商業種子
但咁樣其實係對環境唔好
過份依賴農藥同化肥
仲會令氣候變化嘅情況惡化

陳小姐好鍾意食蕃茄,佢咬咗一啖小麥種出嚟嘅蕃茄
嘩,真係又甜又多汁
所以決定要帶啲蕃茄種子返香港試下種

何小麥望住佢食得好滋味嘅樣
想像有香港嘅小朋友食咗呢啲蕃茄之後
好似陳小姐咁,開心到笑咗出嚟

小麥好似突然明白到
雖然一個人嘅力量好微小
但只要你願意同更多人分享
咁自己所相信嘅事
就有可能散播到更多唔同嘅地方

〖完〗
 樂施會「小農種子項目」

 

#貧窮說 EP4:【非洲村莊的一部手機】 
(聲音演繹:Cloud 雲浩影)

貧窮說,我是複雜而多樣,還會隨社會發展不斷變化。
在貧困村落的一部手機,
是貧窮人與資訊連結、改善生活的媒介。

〖聲音稿〗

離開咗廣西嘅小村落
陳小姐下一個服務地點係非洲嘅坦桑尼亞 
坦桑尼亞係世界上其中一個開發程度最低嘅國家
而陳小姐今次去嘅目的地,係一條離城市好遠嘅村落,陳小姐都有晒心理準備
無諗到,條村俾陳小姐嘅第一個印象
竟然係佢哋唔少村民都有手提電話
就咁睇落,難免覺得:「佢哋都唔係好窮啫」
 
再dup 低頭睇睇,大家手上面雖然揸住部舊款電話
但唔少人亦只係着住一對好殘舊嘅鞋
  
原來對非洲農民嚟講,手提電話已經係一個重要工具
就算連鞋都冇得着,都希望有一部電話
因為呢個係佢哋接觸資訊嘅渠道
尤其係氣候變化之下,天氣變得無辦法預測
非洲農民真係唔可以再好似以前咁
單靠睇下個天就去種田,隨時有旱災、蟲災
所以呢,天氣資訊真係好重要
 
透過手提電話,佢哋可以接收天災嘅資訊,及早防範
咁就可以決定幾時落種子、幾時收割,增加農作物收成
如果唔係,真係好易血本無歸㗎

偏遠嘅貧窮農民好難出去市場買賣 
喺資訊唔均等嘅情況下
佢哋通常都係受壓迫嘅一方
有啲好貧窮嘅村落,就算得一兩個村民有電話
成條村都可以得到重要嘅防災資訊、同埋農作物價格嘅訊息
從而有機會改善佢地貧困嘅生活
 
以前啲人講嘅貧窮,通常都係無屋住無飯開果種
但係貧窮會隨著社會發展而不斷變化
當手提電話變成必須品,一個人就算拎住部手機,
都唔等於佢好有錢
反而無手機,更加同社會隔絕,好難生存
生活更加貧窮

第二朝,其中一位農村婦女攞住部電話行埋嚟
原來佢想加陳小姐嘅 Facebook 做朋友
陳小姐當然好開心咁攞咗部電話出嚟add 佢做 friend 啦
 
返到香港之後,陳小姐間中都會留意吓呢位住喺坦桑尼亞嘅朋友
雖然佢唔係成日更新
但每次睇到坦桑尼亞朋友嘅相,佢都覺得
世界好大,同時亦都好細

〖完〗